ރާއްޖޭގައި 3 ވަނަ އަށް އެންމެ މެމްބަރުން ގިނަ ޕާޓީ ކަމަށްވާ، ޖުމްހޫރީ ޕާޓީ ބޮޑުކުރުމަށް އެ ޕާޓީގެ ރަސްމީ ޖަގަހަ މާފަންނު ކުނޫޒުގައި ކުރިއަށްގެންދާ ސިލްސިލާ ޖަލުސާތަކުގައި އާދަޔާ ޚިލާފަށް ގިނަ ބަޔަކު އެ ޕަޓީ އަށް ސޮއެކުރަމުން އެބަދެއެވެ.
އެގޮތުން، ރޭ ކުނޫޒުގައި ބެއްވި ޖަލުސާއެއްގައި ވެސް އެ ޕާޓީ އަށް ގިނަ އަދެއްގެ ބަޔަކު ސޮއެކޮށް، ފޯމުތައް ވަނީ ޕާޓީގެ ލީޑަރު އޮނަރަބަލް ޤާސިމް އިބްރާޙިމްއާ ހަވާލުކުރައްވާފައެވެ. ރޭގެ ޖަލުސާ ހުށައަޅުއްވަމުން ޖޭޕީގެ ސްޕޯކްސް ޕާސަން އަޙުމަދު އަނޫޝް ވިދާޅުވީ، ރަސްމިއްޔާތެއްގައި ގިނަ ބަޔަކު ސޮއެކުރާ މަންޒަރު ދައްކައިދިނުމުގެ މައިގަނޑު ސަބަބަކީ ޖޭޕީ އަށް ވަންނަ މެމްބަރުންގެ އަގު ވަޒަންކުރުން ކަމަށެވެ. “ޖޭޕީގެ ކޮންމެ މެމްބަރަކީ ވެސް އަގު ބޮޑު ރައުސްމާލެއް، އެހެން ވީމާ އެބޭފުޅުންގެ އަގު އަޅުގަނޑުމެން ވަޒަން ކުރަން ޖެހޭ” އަނޫޝް ވިދާލުވިއެވެ.
ރޭގެ ޖަލުސާގައި އެ ޕާޓީގެ ލީޑަރު ވަނީ މޯލްޑިވްސް ޑިމަކްރެސީ ނެޓްވޯކް (އެމްޑީއެން)ގެ ރިޕޯޓު ލިޔުނު ފަރާތްކަށް ހޫނު ބަހުގެ ހަމަލާތަކެއް ފޮނުއްވާފައެވެ. އެގޮތުން، ރާއްޖޭގައި އިސްލާމްދީން އޮތް ގޮތުގެ މައްޗަށް ކަމަށް ބުނެ، އެ ޖަމްއިއްޔާގެ ބަޔަކު ލިޔެ، ނެރުނު ރިޕޯޓެއްގައި އިސްލާމްދީނާ މާތް ރަސޫލާއަށް ވަރަށް ބޮޑަށް ފުރައްސާރަ ކޮށްފައިވާ މައްސަލައާ ގުޅިގެން ފިޔަވަޅު އެޅުން ލަސްވި ނަމަވެސް، ސަރުކާރުން އެ ޖަމާއަތާ ދެކޮޅަށް ފުރިހަމައަށް ފިޔަވަޅު އަޅުއްވާނެ ކަމަށް ސަރުކާރު ކޯލިޝަންގައި ހިމެނޭ ޖޭޕީގެ ލީޑަރު ޤާސިމް އިބްރާޙިމް ވިދާޅުވިއެވެ.
ޤާސިމް އިބްރާޙިމް ވިދާޅުވީ އެމްޑީއެންގެ ރިޕޯޓް ލިޔުނު މީހުން ތިބީ ވަރަށް ބޮޑު އޮޅުމެއްގެ ތެރޭގައި ކަމަށެވެ. ދިވެހިންނަކީ އެހެން ބަޔަކު ލިޔެލާ ރިޕޯޓަކުން އެމީހުންގެ ދީނީ އަގީދާ ދޫކޮށް އެހެން ބަޔަކަށް ތަބާވާނެ ބައެއް ނޫން ކަމަށާއި އަދި ދީނަށް ފުރައްސާރަކުރި އެމްޑީއެން ދާނީ ނިކަމެތިވަމުން ކަމަށް ވެސް އެމަނިކުފާނު ވިދާލުވިއެވެ.
