ޖުމްހޫރީ ޕާޓީ ބޮޑުވެ ފުޅާވަމުންދާ އެންމެ ބޮޑު ސަބަބަކީ އެމަނިކުފާނުގެ އޯގާތެރި ސިފަފުޅާއި އެކު ސިޔާސީ ގޮތުން އެއްވެސް މީހަކު މާޔޫސްވިޔަ ނުދެއްވާ ބޭފުޅެއްގެ ގޮތުގައި ޕާޓީގެ ލީޑަރ އޮނަރަބަލް ޤާސިމް އިބްރާހީމް ސާބިތު ކަމާއެކު ދެމިހުންނެވުމުން ކަމަށް އެޕާޓީން ބުނެފިއެވެ.
ވީޓީވީގެ ފަސްމަންޒަރު ޕްރޮގްރާމްގައި ޕާޓީގެ ސެކްރެޓަރީ ޖެނެރަލް އަދި ރައްޔިތުންގެ މަޖިލީހުގެ ކެލާ ދާއިރާގެ ކުރީގެ މެމްބަރު، ޢަލީ ޢާރިފް ވިދާޅުވީ އެބޭފުޅުންގެ ސިޔާސީ ޙަޔާތް މާޔޫސްވިޔަ ނުދެއްވައި ބަލައިގަތް ބޭފުޅަކީވެސް ޤާސިމް ކަމަށެވެ. އަދި ބަޔަކު ރުހުނަސް ނުރުހުނަސް އެއީ ޙަޤީޤަތް ކަމަށާ ދިވެހި ކޮންމެ ރައްޔިތަކީ އެމަނިކުފާނުގެ އަރިއަހުގައި އިހްތިރާމަކާއި ގަދަރު ލިބިގެންވާ މީހެއް ކަމަށް ޢާރިފް ވިދާޅުވިއެވެ.
ޢާރިފް މިގޮތަށް ވާހަކަ ދައްކަވާފައިވަނީ ފާއިތުވި 10 ވަރަކަށް އަހަރު ވެރިކަމަށް ވަޑައިގަންނަވަން ބޭނުންފުޅުވި ކޮންމެ ބޭފުޅަކުވެސް ޤާސިމްގެ ފަހަތްޕުޅަށް ވަޑައިގެން ވެރިކަން ހޯއްދެވުމަށްފަހު ކަންތައްތައް ވަމުންދާގޮތަށް އިޝާރާތް ކުރައްވައިފައެވެ. ނަމަވެސް މިހާތަނަށް މިސަރުކާރުން އަދި ކަސިޔާރު މަގެއް ޚިޔާރު ނުކުރާ ކަމަށާ އެމަނިކުފާނަށްވެސް އިހާނެތި ކަމެއް ނުދޭކަން ޢާރިފް ވަނީ ފާހަގަ ކުރައްވައިފައެވެ.
ޖުމްހޫރީ ޕާޓީގެ ލީޑަރ އޮނަރަބަލް ޤާސިމް އިބާރާހީމަކީ ރާއްޖޭގެ ޑިމޮކްރަސީއަށް އަގު ނުކުރެވޭފަދަ ޚިދުމަތް ކުރައްވާފައިވާ ބޭފުޅެކެވެ. އަދި އެކަމުގައި އެމަނިކުފާނު ސާބިތުވެ ހުންނެވުމަކީ ޙަޤީޤަތް ގަބޫލުރާ ކޮންމެ މީހަކުވެސް އެއްބަސްވާނެ ކަންކަމެވެ. ނަމަވެސް އެމަނިކުފާނުގެ ކުރިއެރުމާއި އެމަނިކުފާނުގެ ސިޔާސީ ހަޔާތަށް ހިޔަނިއެޅުމަށް މަސައްކަތްކުރާ ބަޔަކު ފާޑުކިޔަމުންދާތީ ޢާރިފް ވަނީ އެކަމަށް ޖަވާބު ދެއްވައިފައެވެ.
ޢާރިފްވަނީ އޭނާ ޖުމްހޫރީ ޕާޓީއާއި ގުޅިވަޑައިގަތުމުން ފާޑުކިޔާ ފަރާތްތަކަށްވެސް ރައްދު ދެއްވައިފައެވެ. އަދި ވިދާޅުވީ ސިޔާސީ ގޮތުން ކުރިއަށްދާން ބޭނުންވާ މީހުނަށް ފަހި ފުރުސަތު އޮންނަ މަގުތައް ބަލައިގެން ކޮންމެ މީހަކުވެސް އެމަގުން ހިނގާ ކަމަށެވެ. އެގޮތުން އޭނާ ޖުމްހޫރީ ޕާޓީއާއި ގުޅިވަޑައިގަތީ އެ ޕާޓީގެ ކުރިމަގެއް އޮތްކަމަށް ދެކިވަޑައިގެން ކަމަށެވެ.
ނަމަވެސް އޭނާއަށް ޕާޓީގެ އަމީން ޢާންމުކަން ލިބިވަޑައިގަތީ އޭނާ އެކަމަށް އުއްމީދުވެސް ނުކުރައްވައި ހުންނަވަނިކޮށް ކަމަށެވެ. އެއީ ސިޔާސީ ގޮތުން ކުރިއަށްދާ މީހުނާމެދު ޖުމްހޫރީ ޕާޓީގެ ލީޑަރު ދެކިވަޑައިގަންނަވާ ގޮތް ވަރަށް ރަނގަޅަށް ސާފުވެ ވަޑައިގެންނެވި ކަމެއް ކަމަށެވެ. އަދި ސިޔާސީ ރޮނގުން ކުރިއަށްދާން ބޭނުންވާ މީހުނަށް ފުރުސަތު އޮތްކަން އެކަމުންވެސް ހާމަވެގެންދާ ކަމަށެވެ.
ޢާރިފް ވިދާޅުވީ އޭނާއަކީ އަބަދުވެސް ވަފާތެރި ބޭފުޅެއް ކަމުގައެވެ. އަދި މިހާރު ޖުމްހޫރީ ޕާޓީގައިވެސް ދެމިހުންނަވާނީ އެގޮތުގެ މަތީގައި ކަމަށެވެ. އަދި ރައްޔިތުންގެ ކިބައިންވެސް އެދިވަޑައިގަންނަވަނީ ޖުމްހޫރީ ޕާޓީގެ ލީޑަރޝިޕްގައި ބައިވެރިވެ ވަޑައިގެން އެންމެން އެކުގައި ރާއްޖޭގެ ޙާލަތު ރަނަޅު ކޮށްދެއްވުމަށް މަސައްކަތް ކޮށްދެއްވުމަށެވެ.
އެކަމުގެ ސަބަބެއް ކަމަށް އޭނާ ވިދާޅުވީ ޤާސިމްގެ ހަރުދަނާ ޝަޚުސިއްޔަތު ކަމަށެވެ. އެއީ ބަޔަކު އެމަނިކުފާނާއިމެދު ކިތަންމެ ވާހައެއް ގޮތްގޮތަށް ދެއްކި ނަމަވެސް އެމަނިކުފާނަކީ ހުންނެވި އެއްގޮތެއްގައި ޤާއިމްވެ ވަޑައިގެން ހުންނަވާތީ ކަމަށެވެ.
އެކަމުގެ ހެއްކެއް ކަމަށް ޢާރިފް ވިދާޅުވީ 2008 އިން ފެށިގެން އައި ކޮންމެ ސަރުކާރެއް ދަމަހައްޓަވައިދެއްވުމަށް ކުރެއްވި މަސައްކަތްޕުޅާ އެއިން ކޮންމެ ސަރުކާރެއް ގެނައުމުގައި ޤާސިމްގެ އެހީތެރިކަން ސަރުކާރު އެކުލަވައިލާ ބަޔަކު ހޯދަމުން ގެންދާތީ ކަމަށެވެ. އަދި އެއިން ކޮންމެ ސަރުކާރެއްގެ ކިންގ ޕިން އަކަށް ނުވަތަ ގިއުގަނޑު ފުރިހަމަކުރާ ރާވަޅިއަކީ ޤާސިމްކަން ދިވެހި ތާރީޚުން ފޮހެ ނުލެވޭނެ ކަމަށެވެ. އަދި ޤާސިމާއި ނުލައި އެއްބަޔަކަށް އަޣުލަބިއްޔަތެއް ހޯދިފައި ނުވާކަމަށް ޢާރިފް ވިދާޅުވިއެވެ.
