ޖުމްހޫރީ ޕާޓީގެ ސެކްރެޓަރީ ޖެނެރަލަކަށް ރައްޔިތުންގެ މަޖިލީހުގެ ކުރީގެ މެމްބަރު، އަލީ އާރިފް އައްޔަންކޮށްފި އެވެ.
އަލީ އާރިފަށް އެ ޕާޓީގެ ސެކްރެޓަރީ ޖެނެރަލްކަމުގެ ލިޔުން ހަވާލު ކޮށްދެއްވީ ޕާޓީގެ ލީޑަރު ގާސިމް އިބްރާހީމެވެ.
އެންމެ ފަހުން ޖޭޕީގެ ސެކްރެޓަރީ ޖެނެރަލަކަށް ހުންނެވީ ހެލްތު މިނިސްޓްރީގެ ކުރީގެ ސްޓޭޓް މިނިސްޓަރު ޑރ. ހުސައިން ރަޝީދެވެ.
ޖޭޕީގެ ހިންގުންތެރިކަން ކުރިއަށް ވުރެ ހަރުދަނާކޮށް، ކުރިމަގަށް ތަފާތު ޕްލޭންތައް ހަދަން އެޕާޓީން މިހާރުވަނީ ފަށާފައެވެ. އެގޮތުން އެޕާޓީގެ ޚާއްސަ ކޮންގްރެސް އެއް ބާއްވާނެ ކަމަށާއި، ޕާޓީގެ ހުރިހާ މަޤާމުތަކަށް ކުރިމަތިލުމަށް ހުޅުވާލައި، ޖޭޕީއަށް ބޮޑެތި ބަދަލުތަކެއްވެސް ގެނެވޭނެ ކަމުގައި ޖޭޕީގެ ލީޑަރު ޤާސިމް ކުރިން ވަނީ ވިދާޅުވެފައެވެ.
މިފަހުން ޖޭޕީއަށް ގިނަ މެމްބަރުންތަކެއް އަންނަނީ ގުޅެމުންނެވެ. އެގޮތުން ޕީޕީއެމްގެ ބައެއް އިސް ބޭފުޅުންތަކެއް ވެސް ވަނީ ދާދިފަހުން ޖުމްހޫރީ ޕާޓީ އަށް ސޮއި ކުރައްވައިފައެވެ.
