އިސްލާމް ދީން ޤަބޫލު ނުކުރާ މީހުން ރާއްޖެ ދޫކޮށް ގޮސް އެމީހަކު ކުރާ ކަމެއް ކުރުމަށް ޖުމްހޫރީ ޕާޓީގެ ލީޑަރު ޤާސިމް އިބްރާހީމް ގޮވާލައްވައިފި އެވެ.
ޖުމްހޫރީ ޕާޓީއާއި އިތުރު މެންބަރުން ގުޅުމަށް ޖޭޕީގެ މައި މަރުކަޒު، މ. ކުނޫޒުގައި މިރޭ ބޭއްވި ރަސްމިއްޔާތުގައި ޖުމްހޫރީ ޕާޓީގެ ލީޑަރު ޤާސިމް އިބްރާހީމް ވިދާޅުވީ ދިވެހި ރާއްޖެއަކީ ސައްތައިން ސައްތަ މުސްލިމް ޤައުމެއްގެ ގޮތުގައި އޮންނަތާ 900 އަހަރު ފުރެން ކައިރިވެފައިވާއިރު އެކަން އެހެން ގޮތަކަށް ބަދަލުކުރަން މަސައްކަތް ނުކުރުމަށެވެ. އަދި އެހެން ގޮތެއް ބޭނުން ވާ މީހުންނަށް އޮތީ ރާއްޖެ ދޫކޮށް އެހެން ގޮތްގޮތަށް އުޅެވެން އޮތް ތަނަކަށް ގޮސް އެމީހަކު އުޅެން ބޭނުންވާ ގޮތްގޮތަށް އުޅުން ކަމަށެވެ.
ޤާސިމް އިބްރާހީމް މިރޭ ވެސް ވަނީ އެމްޑީއެން އިން ނެރުނު ލާދީނީ ރިޕޯޓް ވަރަށް ބޮޑަށް ކުށްވެރި ކުރައްވައިފައެވެ. ޤާސިމް އިބްރާހީމް ވިދާޅުވީ އިސްލާމް ދީނަށް ގޮންޖަހައި ﷲ ތައާލާ އަށް ބަދުބަސް ބުނެ ރަސޫލް (ޞޢވ) އަށް ފުރައްސާރަ ކުރުން ފަދަ ކަންކަން ރާއްޖޭގައި އަދިވެސް ކޮށްފިނަމަ ސަރުކާރުން އަޅަންޖެހޭ ފިޔަވަޅުތައް ރައީސް އިބްރާހީމް މުޙައްމަދު ޞާލިޙް އަޅުއްވަމުން ގެންދަވާނެ ކަމަމަށެވެ.
އެބާވަތުގެ އަމަލެއް ކުރުމުން ސަރުކާރަށް ފިޔަވަޅު އެޅޭނީ ކަންކަން ބަލަން ޖެހޭ މިންވަރަށް ބަލައި ޤާނޫނީ ހަމަތަކުން ކަމަށެވެ. ދުނިޔޭގައި ގިނައީ މުސްލިމުން ނޫން ކަމަށާއި ފަސާދަ އުފައްދާ މީހުން ވަރަށް ގިނަ ކަމަށެވެ. އެހެންކަމުން އެފަރާތްތަކުން ފޯރުވައިފާނެ ނުފޫޒުތަކުން ޤައުމު ސަލާމަތްކުރެއްވުމަށް ވެސް ރައީސުލްޖުމްހޫރިއްޔާ ވިސްނަވަމުން ގެންދަވާނެ ކަމަށެވެ.
ޤާސިމް އިބްރާހީމް ވިދާޅުވީ ރާއްޖޭގައި ފަސާދަ އުފައްދަން މަސައްކަތްކުރި އެމްޑީއެން އުވާލައްވާނެ ކަމަށާއި އެކަން ކުރި ބައަކާއިމެދު ފިޔަވަޅު އަޅުއްވާނެ ކަމަށް ކުރިންވެސް ވިދާޅުވަމުން ގެންދެވީ އެކަން އެގޮތަށް ކުރައްވާނެ ކަމުގެ ޔަޤީންކަން އޮތުމުން ކަމަށެވެ. އަދި އެމްޑީއެން އުވާލަން ސަރުކާރުން ނިންމައި މިއަދު އެޅި ފިޔަވަޅަށްޓަކައި ރައީސް އިބްރާހީމް މުޙައްމަދު ޞާލިޙަށް ޝުކުރު އަދާކުރައްވާ ކަމަށެވެ.
ޤާސިމް އިބްރާހީމް ވަނީ އެމްޑީއެން ކުރީ ވަރަށް ބޮޑު ކުށެއްކަން ފާހަގަ ކުރައްވައި އެ ކުށް ކުރި މީހުންނާއިމެދު ފިޔަވަޅު އެޅުމަށް މީގެ ކުރިންވެސް ގޮވާލައްވައިފައެވެ. އަދި އެމަނިކުފާނު ގެންދަވަނީ ރާއްޖޭގައި އިސްލާމް ދީން ނޫން އެއްވެސް ދީނަކަށް ފުރުޞަތު ނުދެއްވާނެކަމަށާއި ރައްޔިތުން ބޭނުންވަނީ ރާއްޖޭގައި ހަމައެކަނި އިސްލާމް ދީން އޮތުމަށް ކަމަށްވެސް ވިދާޅުވަމުންނެވެ.
